ԵՄ երկրների առաջնորդները, որոնք ներկայացնում են Եվրախորհրդարանի խոշորագույն կուսակցությունները, համաձայնության են եկել Ուրսուլա ֆոն դեր Լյայենի թեկնածության շուրջ Եվրահանձնաժողովի ղեկավարի պաշտոնում նոր ժամկետով: Այս մասին հայտնում են գերմանական Frankfurter Allgemeine Zeitung-ը և dpa-ն, ինչպես նաև Politico-ն՝ հղում անելով Եվրամիության իշխող կառույցների աղբյուրներին։

 Եվրոպական դիվանագիտությունը կգլխավորի Էստոնիայի վարչապետ Կայա Կալլասը։ Որպես ԵՄ արտաքին գործերի և անվտանգության քաղաքականության գերագույն ներկայացուցիչ՝ Կալլասը կփոխարինի Ժոզեպ Բորելին, որն այդ պաշտոնը զբաղեցնում էր 2019 թվականի դեկտեմբերից։

Եվրոպական խորհրդի նախագահի պաշտոնում համաձայնեցվել է Պորտուգալիայի նախկին վարչապետ Անտոնիո Կոշտայի թեկնածությունը։ Նա կփոխարինի Շառլ Միշելին։

 ԵՄ ղեկավարության պաշտոններում թեկնածուների քննարկմանը մասնակցել են Հունաստանի, Լեհաստանի, Իսպանիայի և Նիդեռլանդների կառավարությունների ղեկավարները, ինչպես նաև Ֆրանսիայի նախագահն ու Գերմանիայի կանցլերը, գրում է Politico-ն։

Հունիսի 27-ին ֆոն դեր Լյայենի, Կալլասի և Կոշտայի թեկնածությունները կներկայացվեն ԵՄ անդամ բոլոր երկրների ղեկավարներին, ովքեր կհավաքվեն Բրյուսելում կայանալիք գագաթնաժողովին։